2024.6.1-C│愛情公寓交友網站與聊天室

還沒登入愛情公寓嗎？還沒加入愛情公寓嗎？馬上進入公寓和 10,541,271 個住戶交朋友～

紅包抽抽樂！小資變土豪！

素人也能成為明日之星！

移除此區廣告請加入VIP

檔案狀態:

住戶編號:2268321

C 的日記本

快速選單

2024.5.25 《前一篇

後一篇》 2024.6.8

回應

給他日記貼紙

給他愛的鼓勵

檢舉

篇名: 2024.6.1
作者: C	日期: 2024.06.01　　天氣: 　心情:

今仔日是六月初一，禮拜六。我佇便所食薰寫日記。
昨暗載太太囡仔去噗噗嚕，我去711領錢納房屋稅。
囡仔噗噗嚕轉來了，佇樓跤看電視，看到九點，才起來吵欲去新厝。
我原本想講今仔日欲載阿爸阿母去林園看畫展，就無欲去，囡仔講甲強欲號出來。
我就答應載去，毋過我袂當過暝。
太太一路攏激一個面腔，無講話。
到遐了，我先共該做的攏款好，想欲轉來，結過太太就袂直矣
開始問我最近閣咧無閒煞啥，愛我家己講，我毋知伊佗一條筋閣毋著矣，
我問講啥物代誌？伊講莫以為伊毋知，愛我家己講。
我實在毋知伊咧講啥。
我就甲最近公司產品愛無閒發表主持的代誌講一下。
伊講毋是，伊講我透早出去是去佗位？去揣啥物人？
我這禮拜只有兩日較早出門去711抑是美廉社買報紙咖啡爾爾。
伊毋信，閣一直奇。講我無欲顧囡仔，逐暗囡仔揣我攏揣無。
就按呢冤甲欲十一點。就是無愛我轉去。
我就只好先陪囡仔睏，囡仔閣無愛我陪，我就只好去房間。
愈想愈艱苦。
我對伊後頭的人是有夠好，攏想欲招伊落來耍，結果太太是連我陪厝裡的人攏袂使。
伊講我這嘛轉去就自由矣，放伊一人顧囡仔，
我欲招伊做伙去看畫展伊嘛無愛，變成我就愛縛佇遐看伊歡喜。
我共太太講：抑無，明仔透早七點，幫我開電梯。伊驚著，愛遐早？
伊大姊敲電話來，伊隨換口氣講規餔，
我落尾甲講我出門前就共阿爸阿母講我欲轉去，我愛充電，明仔日愛導航。
我堅持愛轉去，叫伊幫我開電梯我才會當走。
轉來到厝拄好十二點。

太太是因為囡仔齪，才想愛我鬥顧。我毋是無顧啊。
伊逐暗攏佇眠床頂看直播、看福寶。拄著囡仔就用喝的。
透早我較早起來，囡仔的物件攏我咧款，伊起來就佇便所較欲半點鐘。
除了拜二開會愛較早，我袂當載，其他四日攏嘛我愛載，囡仔晏起床，我嘛會袂赴。
太太無愛囡仔去安親班，堅持下晡欲去公司睏晝寫功課。
我講來阮公司遐的學校，我來載，下晡我會當顧，太太嘛無愛。

我看日記，頂擺冤家是無甲半個月前。
一個月四個禮拜。固定一禮拜去台中，固定一禮拜載阿爸阿母去草地收厝稅
其他兩禮拜就是愛冤家的禮拜。
厝裡袂當有其他的活動，攏愛配合伊就著。

今年母親節伊嘛是以台中為主，阮兜的就愛較其次，伊講趕會赴就參加，趕袂赴就準煞。
害我就愛駛緊車，時間才袂差傷濟。
我講這馬我攏會驚伊，無愛佇房間是因為囡仔做代誌拖沙，
看著我來就愈秤採，太太看伊秤採就閣開始大聲喝罵，我就愈齷齪。
若和太太講幾句話，無的確伊就閣彼句：你最近閣咧創啥，莫以為我無知喔。你閣咧佮啥人聯絡？你的錢哪會賰遮少？
因為驚聽著這款話，袂輸"藐視國會法"
講抑無著，無講抑無著，佮袂使無講。反正攏是有罪就是。

標籤:

瀏覽次數:83 人氣指數:103 累積鼓勵:1

切換閱讀模式

回應

給他日記貼紙

給他愛的鼓勵

檢舉

給本文愛的鼓勵：